係功課方面，佢畀好多好枯燥嘅文章比我哋睇，然後我哋就要就住一啲好複雜嘅題目寫返啲好簡短嘅論文出嚟，例如用兩板紙，隔行咁寫關於美國內戰嘅種種原因。信我，咁樣寫法係遠遠難過用5至10板紙去寫同一個題目，因為你要非常小心咁揀用邊啲字。唔係嘅話，你未寫到入肉就已經寫完兩板紙。你最多只係俾用兩板紙寫野。如果你寫咗2.1板紙，你份功課就會肥佬。寫嘢拖泥帶水係唔俾嘅。
雖然佢唔受歡迎，但呢位老師講到明，佢嘅教學目標係教啲學生學識獨立思考，而唔係剩係識得執人口水尾，重複講返一啲喺其他地方學返嚟嘅嘢。對住一班17歲嘅後生仔，呢個目標其實好難實現，尤其係喺講緊一個好似美國歷史咁嘅科目。
我覺得「你有錯嘅權利」呢句口頭禪，雖然當年多數只係當係一個笑話咁喺班上面講，但佢其實係一個好好嘅建議嚟。雖然佢冇寫到落《美國權利法案》到，但佢或者可以當做一個基本嘅人權。你有錯嘅權利。你有權去犯錯。你有權失敗。
不過好多人睇唔到運用呢個權利嘅價值。我諗咁亦都係啲人咁驚當眾講嘢嘅主要原因。如果你就住某件事講咗你嘅主張出嚟，然之後比人駁到一棟都冇，證明你錯到七彩嗰陣，你又點落台呢？
究竟犯錯有咩咁得人驚呢？如果你從來唔犯錯，對我嚟講，咁只係代表你冇成長過。我希望5年之後，當我睇返一啲自己今年寫嘅 blog嗰陣，我會唔同意自己之前嘅睇法。唔係嘅話，咁一係代表我冇咩成長到，又或者我之前唔夠大膽去表達自己嘅諗法。
唔好驚去試一啲自己冇把握嘅嘢。呢個係其中一個最好嘅學習方法。等其他人畀反應俾你嘅ideas。有時佢哋會講返一啲新嘢比你聽，令你可以改進返你嘅ideas。其他時候佢哋可能只係會好情緒化咁比反應你，令你可以更加識得用平常心看待其他人嘅情緒。無論係同人傾偈、演講、寫文、寫blog定喺論壇出post，只要你可以聽返人哋嘅feedback，就唔好驚提出你嘅ideas。
將你嘅自我意識擺埋一邊
我覺得啲人咁抗拒犯錯，係因為佢哋將自己嘅ideas同咗佢哋嘅自我評價掛鉤。所以當佢哋嘅ideas比人彈到一個仙都唔值嗰陣，佢哋會當成係佢哋個人嘅失敗——佢哋會覺得自己畀人侮辱咗咁。「𡃁仔，你今晚真係衰咗喎。」其他人嘅feedback可能更加會令佢哋咁樣諗。但係其他人將你嘅ideas等同咗你呢個人，唔代表你都一定要跟住咁樣做。
將太多自我意識投放喺你所做嘅嘢嘅結果到，一嚟對件事冇幫助，二嚟亦都冇咁嘅必要。如果你覺得你嘅ideas衰咗就係你個人衰咗，咁你就好少會去冒險，而冒呢啲險本身係可能有回報嘅。但如果你可以學識將「自己」同「自己嘅ideas同自己做嘅嘢」分開，然之後將「自己嘅ideas同自己做嘅嘢」睇成係一啲同「自己」互相獨立嘅嘢，你就會覺得你真係有錯嘅權利。如果一個idea衰咗，點解唔可以係個idea有問題，而唔係你個人有問題？俾你嘅ideas失敗啦，唔洗將呢啲失敗當成係個人嘅失敗㗎。
當我寫文或者演講嗰陣，我會盡可能將我嘅自我意識擺埋一邊，令自己唔會執著嗰結果好唔好。Ideas就係ideas，唔等同於我。就算我講返我嘅親身經歷，呢啲經歷都依然唔等同真正嘅我。佢哋只不過喺一啲說話。如果我講咗個演講，然後個反應好差，咁都可能只係因為我未夠掌握演講嘅技巧。但都係啦，我嘅技能唔等同真正嘅我。我嘅ideas同技能都只不過係一啲我有嘅野或者我整出嚟嘅嘢，但佢哋唔可以定義到真正嘅我。因為咁，我從來都唔會覺得我嘅自我形象會受到啲咩傷害，就算我嘅演講或者我寫嘅文炒哂車，都係咁話。
如果一個idea好似真係得米，我亦都唔會將佢當成係個人嘅功勞。我只係會諗⋯⋯嗯，睇嚟呢個的確係一個幾好嘅idea。如果一個idea出到嚟唔多掂，我會睇吓有冇啲有用嘅feedback，然後再改良或者放棄嗰個idea。又可能係我覺得嗰idea表達得唔夠好，因為講得差而講唔到我想講嘅意思。對我嚟講，呢啲全部都只係feedback，話俾我知我要去諗更加好嘅ideas，同埋改進溝通技巧。
我覺得呢種心態幫到我好輕鬆咁講一個演講而唔會覺得緊張，同埋可以經常性咁寫文畀成千上萬嘅讀者睇。我覺得出錯對我嚟講其實好平常。討論好似個人成長咁複雜嘅主題，難免會遇到好多灰色地帶。就算考慮到所有我喺呢個領域嘅知識同埋經驗，我都冇辦法可以期望自己可以完美咁理解晒呢個廣闊領域嘅所有層面。同埋我嘅溝通技巧總係唔夠準確嘅。有效嘅溝通需要邏輯同感情嘅結合，而邏輯同感情有時會互相矛盾，同埋對唔同嘅人有唔同嘅效果。我唔識得有咩偉大嘅講者或者作家，喺講任何有價值嘅嘢嘅時候，可以得到人哋一致嘅認同。只要可以將自己嘅自我意識擺埋一邊，你就可以做到好似邱吉爾所講咁——失敗一次又一次，同時唔會失去你嘅鬥志。
你可以點樣更好咁運用你犯錯嘅權利呢？你有冇試過驚咗去健身室，因為你唔知你喺嗰度做咩好，覺得自己到時只會睇落好似一個傻仔咁？唔好擺你嘅自我意識上檯啦——記住你只係差啲技巧啫。你作為一個人係唔會因為唔識某啲知識同技巧而有啲咩缺憾㗎。仲有啲咩係你試咗可能會證明你錯或者無知，但係長期結果只不過係一個瘀咗嘅自我形象(甚至連自我形象都唔會受到損傷，如果你晨早將你嘅自我意識擺埋一邊嘅話)？
你有錯嘅權利。俾你嘅ideas失敗啦，俾你嘅技能證明佢嘅不足啦，俾你嘅知識顯示佢嘅局限啦。反正呢三類嘢都唔會代表到真正嘅你。
當你失敗，你就會發現自己依家嘅極限。你會摸索出依家自己嘅能力範圍去到邊。咁樣你就可以最終突破呢個能力範圍嘅界限。
錯最後會變啱，而就算冇做返啱都好，咁都依然比咩都唔做好玩得多。
原文標題︰You Have the Right to Be Wrong
原文作者︰Steve Pavlina